တစ်ခုသောနံနက်တွင် အိမ်သို့ အမေ့သူငယ်ချင်းတစ်ယောက် အလည်လာသည်။ သူမမိတ်ဆွေဟုဆိုသော နိုင်ငံခြားသူ အမျိုးသမီးတစ်ဦးလည်း ပါလာသည်။ INGO တစ်ခုမှဟု သိရသည်။ ပြင်သစ်နိုင်ငံသူတစ်ဦးဖြစ်ပါသည်။ အလုပ်ကိစ္စနှင့် ကျွန်တော်တို့ မြို့ကိုလာရင်း အမေ့ဆီ အလည်လာခြင်းဖြစ်သည်။ အမေက ဧည့်သည်များအား လက်ဖက်သုပ်နှင့်ဧည့်ခံသည်။ လက်ဖက်သုပ်ကို ကောင်းကောင်းမစားဖူးသော ထိုပြင်သစ်အမျိုးသမီးကြိးက ပဲခြမ်းကြော်တို့ကိုယူ၍ အားရပါးရစားသည်။ ( အစာမစားမီက လက်ဆေး မဆေးကိုမူ မမှတ်မိတော့ပါ) " very nice " ဟုထပ်ခါထပ်ခါပြောရင်း ပဲခြမ်းကြော်များကုန်သောအခါ တစ်ရှူးဖြင့် မသုတ်သေးဘဲ လက်ဆေးချင်သည်ဟုပြောသဖြင့် ရေပုံးနှင့် ဆပ်ပြာခွက်ကို ကျွန်တော်က ယူပေးရသည်။ ပြင်သစ်မကြီးက ဆပ်ပြာခွက်အတွင်းမှ ရွှေဝါကို လက်လှမ်း၍ယူသည်။ အမေက Lux ဆပ်ပြာမွှေးနှင့်ဆေးရန်ကမ်းပေးသည်။ သို့သော်ပြင်သစ်မကြီးက ရွှေဝါ၏ကောင်းကြောင်းကို သိနေ၍လားတော့ မသိ။ အမေ့ကိုလက်ပြကာ ရွှေဝါနှင့်ပင် လက်ကို သေချာစွာဆေးပါသည်။ လက်ဆေးပြီးသောအခါ သူမက ရွှေဝါကိုကြည့်၍ " This is also veryb nice " ဟုပင်ပြောလိုက်ပါသေးသည်။ ဤသည်ကား ရွှေဝါနှင့်ပတ်သက်၍ ကျွန်တော်မှတ်မိသမျှ ငယ်ငယ်က အဖြစ်အပျက်ကလေးဖြစ်ပါသည်။ အမေကား ယနေ့အထိ ရွှေဝါကို အိမ်သာတက်ပြီးတိုင်း လက်ဆေးရန် ညစ်ပေလွန်းသည့် အစွန်းအထင်းများ လျှော်ဖွတ်ဆေးကြောရန်အတွက် အသုံးပြုမြဲဖြစ်ပါသည်။ အလုပ်တာဝန်ကျရာ ကျေးရွာများဆီရောက်တော့လည်း ရွှေဝါကုိတွေ့ရဆဲပင် ဖြစ်ပါသည်။ အချို့မိသားစုများက အိမ်တွင် အမေသုံးသလို ဆပ်ပြာကိုနှစ်မျိုးထား၍ အသုံးပြုသော်လည်း ငွေကြေးချို့တဲ့သော မိသားစုအတော်များများမှာကား ရွှေဝါနှင့်ပင် ရေချိုး ရွှေဝါနှင့်ပင် အ၀တ်လျှော်၍ ရွှေဝါနှင့်ပင် မျက်နှာသစ်ကြရပါသည်။
ဆရာကြီး၏လက်သုံးစကားအရ ရွှေဝါဆပ်ပြာတုံးကလေးများကဲ့သို့ အရည်အသွေးပြည့်ရမည့် ကျွန်တော်တို့ဘ၀များပင်ဖြစ်ပါသည်။ အမှန်တကယ် အသုံးဝင်သော ကျေးလက်နေအောက်ခြေပြည်သူများထိ ၀င်ဆံ့သောဘ၀များဖြစ်၍ ကျွန်တော်ကျေနပ်ပါသည်။ တန်ဖိုးထားတတ်သူတို့အတွက် အဖိုးထိုက်အဖိုးတန်ဖြစ်သဖြင့် ကျွန်တော်ပျော်ရပါသည်။ သို့သော် ရွှေဝါဆပ်ပြာတုံးကလေးများကိုလည်း အသုံးမလိုသည့်အခါ ဆပ်ပြာခွက်တွင် လုံအောင်ထည့်၍ ကြောင်အိမ်ထက်တွင် သိမ်းစေချင်ပါသည်..........။
ကိုထင်(U.C.H)
0 comments:
Post a Comment